Rasin ak Limyè

Lizay pou lespri zansèt nou ki repoze anpè.
Lizay pou yo tout ki antoure nou.
Yo menm ki ban m pasaj pou m travèse,
yo menm ki ede m kenbe balans ant de mond paralèl.

Lespri yo ap gide m pou tenèb pa anvayi m.
Depi m tou piti, je yo sou mwen.
Kod lonbrit la plante nan gran lakou,
anba pye Wou ki toujou ban m fòs.

Mèt Limyè toujou avè m,
ak bon beny bwa banbou pou ond pozitif.
Chak gout dlo va pote limyè,
louvri chemen mwen, rale lanmou, lajwa, ak siksè.

M ap taye banda sou ti chèz byen ba mwen,
laye mwen nan men, m ap griye kafe.
Bon sant griyo ap pete nen mwen.
Chak gout tafya fè m souri.

M gade syèl la, m gade lanati,
m remèsye Mèt Latè pou bon randman li ba nou.
Zago m atè, m rete an kontak ak li pou l ban m fòs.

M ap mache sou wout mwen san pè, paske li kenbe mwen.
Pandan Mèt Solèy ap raple m: "Parese pa manje."
Li ranpli m ak melanin, tankou lanmè ak fon.
Li make m, li fè m respekte swè fwon moun, tankou senbòl sakre.

Mèt Lè pou oksijèn nou respire,
pou vwa zansèt yo l ap fè m tande,
tankou yon im ki grave nan panse m.

Li pa pale fò, men li frape anndan.
Li chouchoute m ak ti vwa dous li.
Li karese vizaj mwen ki ap transpire.
Li fè m sonje rasin mwen, orijin mwen.
Lè m vle febli, li ban m bwa chwal pou m rete djanm.

Mèt Dlo pou la wouze li ba nou,
li menm ki lave sa ki twò lou,
li menm ki pote lavi, k ap koule san rete.

Li bwè doulè, li netwaye lespri.
Li kouvri tè a ak dousè li
pou fè flè leve ak kè kontan.

M ap chante lodyans pou zansèt yo,
m ap danse, m ap chante pou onè lavi.
Bon kout tabak ap fè m depale,
gwo wòb mwen ap balanse.

M santi lespri libète anvayi mwen.
M santi l ap mennen m kote zetwal pale.
Kote mistè tan an revele l nan bri van.

M ap flote sou ritm tanbou ki vibre nan fon m.
M ap reponn apèl zansèt yo,
m ap mache sou tras yo kite pou mwen.

✦ Jean François Malaischa ✦
𝘉𝘳𝘶𝘮𝘦 𝘥’𝘦𝘯𝘤𝘳𝘦

Retour au sommaire du Newsletter n°5 | Volume II